بيان هام من إذاعة حلاوة زمان ..
اللهو الخفى يرشح المشير " طنطاوى " لرياسة الجمهورية
إنتخبونى ..!!
أنا مش حدى لحد وعود
ولا عاشق لعيونكم السود
ولا حاخد من " موسى " عصايته..
ولا حعمل للفقر حدود..
ولا حتنيل على عين أهلى ..
ولا حسمع لو حد ندهلى ..
ولا بينكم حأصبح موجود..
فانتخبونى..
وستجدونى ..
أنضف جدا من الموجود
** **
ياجماهير الشعب الواعى!!!
يا أوجاع بتزيد أوجاعى
ياعشمى ..
وغشمى..
وأطماعى..
يا خوفى وبابى المردود..
يا طلسم .. محتاج تفسير
ومعايا ماتفرقش كتير
وزمانكم.. كده كده.. مفقود
فانتخبونى ..
وستجدونى ..
أشجع جدا م الموجود
** **
سبقونى الهلافيت ع القبة..
من بعد ما لهفوا الأصوات
وسابونا بنشر محبة
واتلبخوا فى صرف البدلات
انصرفوا للهدف الأسمى ..
للجمع المشبوه والقسمة..
واترسمت ف وشوشهم بسمة..
وحمارهم .. بقى " زلمكة " !!!
عمدتهم كان أصله غفير
إتبرمج .. وعامل لى " مشير " !!!
وبيفهم قال "ابن الهبله " فى الدساتير !!
ويناقش فى مواد وبنود !!
فانتخبونى ..
وستجدونى ..
أنا مش ألطخ م الموجود
** **
إنتخبونى الله يكرمكم ..
إنتخبونى ينبكوا ثواب ..
حا فضل شاكر فضل كرمكم ..
وأهو كداب " المجلس العسكرى " مطرح كداب " المخلوع " ..
صوتكوا أمانة ..
ضايعا معانا ..
..ال " مرضان "..
أبو بدلة وشنطة
والتعبان ..
أبو دقن أونطه
والحلوف أبو وجه ودود
فانتخبونى ..
وستجدونى ..
أنا مش أوسخ م الموجود
** **
أنا مش حد لحد وعود..
ولا عاشق لعيونكم السود ..
ولا حارفع صوتكم ولا نيلة
دى بلدكم رايحة فى تعسيلة
منكوبة وخبيتها تقيلة
تفكيركم .. دايما محدود
إيدونى ..
لو بالبراطيش
إيدونى ..
وماترحمونيش
دى خبيتكم..
خيبة بكرانيش
ومزاجكم .. فى المش أبو دود
فانتخبونى ..
وستجدونى ..
أحدق جدا من الموجود
مرشحكم على بابا وال" 18 " حرامى
المشاركات
ليست هناك تعليقات:
إرسال تعليق